تجربة رهف مراد - خريجة دفعة 42
1. إيش كان سبب دخولك لعلوم الحاسب؟
دخلت علوم الحاسب لأن له مستقبل واسع ومليان فرص.
2. كطالب مستجد، كيف أعرف إذا علوم الحاسب يناسبني؟
إذا كنت مو متأكد من مجال معين ومحتار بين أكثر من مجال، علوم الحاسب هو المكان المناسب لك، تقدر تجرب وتكتشف مجالات مختلفة لحد ما تلقى اللي يناسبك.
3. لو رجع فيك الزمن، هل بتدخل علوم الحاسب من جديد؟
أكييد ما حختار غيره، لأني تعلمت فيه الكثير واكتشفت فيه شغفي. التخصص فتح لي أبواب كثير وساعدني في تطوير مهاراتي على الرغم من إني كنت داخله التخصص عن غير رغبة. لكن كل تجربة مريت فيها كانت قيمة سواء كانت إيجابية أو سلبية، والتجارب علمتني كيف أكون أكثر مرونة وقدرة على التكيف، وكيف أستمر في تطوير نفسي وأتعلم حتى بعد التخرج، وهذا مهم جداً في سوق العمل اليوم.
4. متى قدرت تحدد مجالك الفرعي؟ وكيف قدرت تحدده؟
بعد التخرج، جربت عدة مجالات واشتغلت فيها، ولقيت نفسي في مجال مختلف عن اللي توقعت. لذلك لازم تجرب المجالات لين تقتنع بالمجال المناسب لك واللي تشوفه مطلوب في سوق العمل.
5. إيش أكثر الأشياء اللي ممكن تفيدك خلال مسيرتك الجامعية؟
الدراسة الأكاديمية والمواد أكيد مفيدة، لكن ما تغني عن التجربة والتعليم الذاتي. بالذات في تخصصنا، لازم نتعلم ونمارس البرمجة بشكل مستمر وتشتغل على مشاريع متنوعة. الدورات والأنشطة اللاصفية أيضاً تساعد في تطوير المهارات الناعمة اللي بتفيدك في سوق العمل بشكل كبير، لأن المهارات البرمجية لوحدها ما تكفي للدخول والنجاح في سوق العمل.
6. كيف كانت الفرص بعد التخرج؟
الفرص موجودة لِمن اجتهد. إذا كنت مجتهد وتبحث دايمًا وبتطور نفسك في المجالات المطلوبة، سوق العمل مليان وظائف متنوعة. وأكبر ميزة في تخصصنا إنك تقدر تنتقل بين مجالات الحاسب بسهولة حسب احتياجات السوق.
7. ممكن تتكلم لنا عن الوظائف المستقبلية في المجال؟ وكيف تشوف سوق العمل حالياً للمتخرجين؟
سوق العمل حالياً يشهد طلب كبير على المتخصصين في مجال الحاسب، خاصة في مجالات مثل تطوير البرمجيات ومجالات الذكاء الاصطناعي. الوظائف المستقبلية لتخصصنا كثيرة وتشمل مهندس برمجيات، مطور برمجيات، مهندس بيانات، مصمم تجربة المستخدم، مختبر برمجيات، وغيرها كثير. فمهم تبقى مطلع على أحدث الاتجاهات في سوق العمل.
8. إيش نصائحك للطلاب المقبلين على تخصص علوم الحاسب؟ وللطلاب اللي مقبلين على التخرج؟
للطلاب المقبلين على التخصص: خليك منفتح لتجربة مجالات مختلفة، وعلم نفسك بشكل مستمر، واطلع على أغلب المجالات عشان تكون قوة لك، وفي نفس الوقت تلقى المجال المناسب اللي تتخصص فيه وتكمل فيه مشوارك.
للطلاب المقبلين على التخرج: حاول تبني شبكة علاقات مهنية، وابحث عن فرص تدريب كويسة تأهلك لسوق العمل. حاول تبني مشاريع تفيدك وتعلي فرص قبولك بعد التخرج، وتأكد من تحديث مهاراتك بما يتناسب مع احتياجات سوق العمل، وخلك جاهز للتكيف مع تغيرات السوق.