تجربة لمار أشرف اندرقيري
انا لمار أشرف اندرقيري طالبة ذكاء اصطناعي من جامعة ام القرى في نهاية السنة التالتة ومتدربة حالياً يبسطني اني أشارككم تجربتي ولو بشي بسيط وان شاءالله انكم تستفيدو والله يوفقكم جميعًا وييسر لكم مشواركم
- إيش كان سبب دخولك الذكاء الاصطناعي؟
للامانه ما كنت عارفه ايش التخصص اللي ممكن يناسبني ولمن دخلت كلية الحاسبات دخلتها وانا مخططه لتخصص وما كان ابداً ذكاء ولا قريب منو ولكن بعد ما استشرت الكتير من الاشخاص المتعمقين والفاهمين ومن ضمنهم دكتورة سارة الشريف اكتشفت انو الذكاء بحر واسع من الاحصاء والرياضيات والجبر الخطي اكتر تخصص له علاقة بالرياضيات ومواد التحضيري الرياضية كلها كانت ممتعة وأحبها، والتطور اللي بنشوفو في الذكاء اللي بيسير فيه كل يوم جذبني اكتر واكتر
- كطالب مستجد، كيف أعرف إذا الذكاء الاصطناعي يناسبني؟
لو كنتي تحب التحليل، وعندك فضول كيف الأشياء تشتغل وبرضو ومن اهم الاشياء تكون عاجبتك المواد الرياضيه وتستمتعي فيها اكتر من انك تبي تحليها بس فالتخصص مناسبك باذن الله ولازم تكون عندك رغبة دايماً انك تتعلمي بنفسك وتطوري واتوقع دا قائم على كل التخصصات
- لو رجع فيك الزمن، هل بتدخل الذكاء الاصطناعي من جديد؟
انا بعد ما كان حيقفل اختيار التخصصات للمره الاولى كنت حاطه رغبتي الاولى غير الذكاء وفي المرا التانيه وبعد استخارات كتير حطيت رغبتي الاولى ذكاء واقدر اقول اني ما بين كل فتره وفتره ادعي ربي لانو الحمدلله الحمدلله الحمدلله ربنا خلاني اغير، لانو ما اظن في تخصص كان حيناسبني قد الذكاء
- متى قدرت تحدد مجالك الفرعي؟ وكيف قدرت تحدده؟
تقريبًا في السنة التالتة لاننا اخدنا اغلب فروع الذكاء الاساسية وعرفناها في جذبنني فرعين من فروع الذكاء ولسى قاعده احاول ابحر فيهم زيادة عشان اكتشف ذاتي وايش اللي ممكن اتعمق فيه اكتر ولكن مع كل مشروع جديد حتحبو فرع اكتر ومادة اكتر، يعني في وحدة من المواد كنت ازاكرها واحلها لاني ابغا يعني كنت افضي نفسي عشان ازاكرها واحلها وانا مبسووطه وادور ورقة الاختبار، فغالباً حتكتشفو الفرع اللي يناسبكم مع المواد والمشاريع
- إيش أكثر الأشياء اللي ممكن تفيدك خلال مسيرتك الجامعية؟
- من الناحية الدراسية:
المشاريع كانت اكتر شي طورني للامانه والدورات كنززز كنززز كنززز تخليكي تكتشفي اشياء ما كنتي عارفه انو ممكن تعجبك، وبرضو اتكلموا مع الدكاترة عن الاسالة اللي في بالكم والاشياء اللي تحوس في افكاركم صدقوني بتلاقو الاجوبة اللي تدوروها ان شاءالله
- من الناحية الاجتماعية:
ادخلو نادي الحاسبات ادخلوا نادي الحاسبات ثم ادخلوه🙏🏻 التغييير اللي سار فيني من الناحية النفسية وكيف اني كنت اطفش في الدوام واحياناً ما ابا اداوم لاني اداوم في ايام الاوف عشان استمتع في الجامعة وانبسط تغيير يفرق حتى في الدراسة صدقوني
- كيف تشوف الفرص بعد التخرج؟ سواءً في التدريب الصيفي/التعاوني أو في سوق العمل؟
الفرص موجودة ولكن اقدر اقول انها مو في مكة مع الاسف فيعني تحتاج انو الواحد يكون مستعد وعندو القدرة للتنقل ومو كل الشركات تطلب "الذكاء الاصطناعي" بسبب انو جديد جديد على اغلب الدنيا وبالزات في مكة يعني شي شبهه مستحيل فكان صعب جداً الاقي فرصه تدريب تعاوني ولكن في مجالات كتير تدمج الذكاء الاصطناعي في شغلها ودا الشي كان له فايدة
- ممكن تتكلم لنا عن الوظائف المستقبلية في المجال؟ وكيف تشوف سوق العمل حاليًا للمتخرجين؟
الوظائف كتير ومتنوعة يعني مهندس تعلم آلة مطور حلول ذكية مختص تحليل بيانات مطور روبوتات ودا الاغلب نشوف كيف حتى الكافيهات سارت تحتاج وغيرها الكتييررر فالسوق قاعد يكبر يوم ورا يوم، خصوصًا في السعودية مع رؤية المملكة 2030 فاقدر اقول انو نعم سوق العمل يحتااج يحتتتتتتاج يحتااج متخصيين ذكاء اصطناعي باذن الله
- إيش نصائحك للطلاب المقبلين على تخصص الذكاء الاصطناعي؟ وللطلاب اللي مقبلين على التخرج من الذكاء الاصطناعي؟
التحضيري مختلف تماماً عن اول سنة ذكاء والسنة الاولى من الذكاء مختلفة تماماً عن التانية والتالتة واقدر اقوول انو التالته أفضلهم لانها مليانننه تخصننا وموادنا كانت ممتعة فلاتحكمو على التخصص من اول سنة بس.. واستمتعووووو في المشوار والطريق وهونها على نفسكم دايماً والله يوفقكم ياررب ويفتح طريقكم.. وللمتخرجين باذن الله لمن اكون منهم ارجعلكم..