تجربة بروج خيمي
السلام عليكم جميعاً انا بروج خيمي طالبة ذكاء اصطناعي - سنة ثالث - متدربة حاليا
1. إيش كان سبب دخولك الذكاء الاصطناعي؟
انا اساسا مهتمة بالانظمة الذكية من الثانوية ومهتمة بالتطوير العملي زي انه يكون عندي روبوت او اني اشتغل على اجهزة وكنت ابغا ادخل هندسة حاسب وماكانت متاحة للبنات ف بعد تفكير مطول وجدت انه الذكاء مقارب لاهتماماتي.
2. كطالب مستجد، كيف أعرف إذا الذكاء الاصطناعي يناسبني؟
في سنة التحضيري في ثلاثة مواد كانت تفاضل، احصاء، جبر . لو كنت تستمتع في دراسة ومذاكرة هذه المواد رغم صعوبتها الشديدة ف بإذن الله الذكاء يناسبك ( مافي مواد سهلة وحلوة انا اتكلم عن متعة مذاكرة هذه المواد)
3. لو رجع فيك الزمن، هل بتدخل الذكاء الاصطناعي من جديد؟
لا، بدخل هندسة كهربائية لكن لو لازلت في ام القرى اكيد بدخل ذكاء ثاني
4. متى قدرت تحدد مجالك الفرعي؟ وكيف قدرت تحدده؟
اخر الترم الثالث ، الصدق ماكانت الاستشارة متاحة لنا زيكم الان ماكان عندنا احد نساله ف اضطريت اختار على حسب شخصيتي وفين اقدر ابدع اكثر ، كنت في حيرة بين الذكاء والامن ، وانا شخصيتي خيالية بزيادة فقررت احقق خيالاتي في الذكاء
5. إيش أكثر الأشياء اللي ممكن تفيدك خلال مسيرتك الجامعية؟ مثلًا المواد الدراسية، المشاريع، الدورات التدريبية، أو الأنشطة اللاصفية؟
الامتناع عن الدراسة مع خصوصي هو افضل شي مفيد خلال المسيرة الجامعية. واذا لقيت نفس المقرر الدراسي بكورسيرا ف هذا بيسهل عليك الدراسة جدا وبتستمتع اكثر في المذاكرة.
6. كيف تشوف الفرص بعد التخرج؟ سواءً في التدريب الصيفي/التعاوني أو في سوق العمل؟
فرص ضئيلة جدا حالياً وركزو على كلمة حالياً احنا المملكة الان تقريبا كل تقنيات الذكاء محصورة في سدايا باقي مجالنا مو متاح او موجد في كل شركة لذلك صعب جدا الحصول على تدريب او وظيفة تتعلق بمجالنا
7. ممكن تتكلم لنا عن الوظائف المستقبلية في المجال؟ وكيف تشوف سوق العمل حاليًا للمتخرجين؟
سوق العمل حاليا زي ماذكرت محتكرينه سدايا والقليل من الشركات الكبيرة وانا اشوفها فرصة تطور نفسك اكثر من خلال المعسكرات السنوية او الي تجي ٦ شهور في سدايا واكادمية طويق ومختلف هذه الاماكن لان الي تقدمه الجامعة من محتوى دراسي انا اشوفه غير كافي ويحتاج تطوير فتخصصنا يعتبر مستقبلي باذن الله لان الذكاء احد اساسيات الرؤية واول ماتنفتح المشاريع الكبيرة والمدن الذكية بنصير احنا من المطلوبين جدا جدا لذلك هذه الفترة نستغلها في تطوير نفسنا .
8. إيش نصائحك للطلاب المقبلين على تخصص الذكاء الاصطناعي؟ وللطلاب اللي مقبلين على التخرج من الذكاء الاصطناعي؟
المقبلين للتخصص حابة اقولكم شات جي بي تي الافضل لكن لاتكون طالب ذكاء وتستعمله بغباء . لاتاخذ نسخ لصق لازم تقرا وتعدل وتغير واذا طلع لك ايرور لاتروح تقول له يحله بس لا اساله وش السبب اقرا عن احتمالات ظهور هذا الايرور واسبابه وبعدها بتحله بدون مساعدة شات اساسا.
وبالنسبة للبنوتات دكاترة هذا التخصص كلهم مراعيين وعسل وعندهم سلبيات وايجابيات لكن احنا مقرراتنا الدراسية دسمة جدا جدا
الطلاب المقبلين على التخرج .. الله يعوضنا تعب التجارب الي مرينا بيها ويوفقنا ويرزقنا اجر هذا العلم.