3 مقالات موسومة ب "الأمن السيبراني"

1. وش كان سبب دخولك لتخصص الأمن السيبراني؟

من وأنا صغير كنت مهتم إني أهكر الألعاب، وأستكشف وأجرب أشياء غريبة، كنت أعدّل على الألعاب وأحاول أغيّر القيم فيها، أغيّر قيمة المبالغ اللي في اللعبة وأشوف وين يصير التغيير في ملفات اللعبة. كنت أستمتع بالفضول والمنطق البسيط اللي يخليك تقدر تهكر اللعبة وتلعبها بالطريقة اللي تعجبك. فكرة "وش بيصير لو سويت كذا؟" دايمًا في بالي. وش حيصير لو رفعت ملف كود بدل صورة الملف الشخصي؟ أو لو دخلت رقم بدل حرف؟ كلها تجارب تحتاج منك تكون شخص فضولي، وهي اللي تكون سبب في إنك ما ودك توقف تتعلم في المجال، الموضوع كان ممتع جدًا. فكنت دايمًا أعرف إن هذا مجالي.

---

1. إيش كان سبب دخولك لتخصص الأمن السيبراني؟

كنت محتارة بين الذكاء الاصطناعي والأمن السيبراني، لأن كل واحد فيهم كان يشدّني بطريقة مختلفة. لكن اللي حسم الموضوع كان موقف قبل التخصيص صار وهو اني تهكرت ولله الحمد، وكانت تجربة سيئة جدًا من كل النواحي. شعور العجز والقهر اللي حسّيت فيه خلاني اقول ما راح أسمح لأي أحد يمر بنفس اللي مريت فيه. من هنا بدأت رحلتي في الأمن السيبراني، وصار الموضوع بالنسبة لي أكثر من مجرد تخصص… صار رسالة

---

تجربتي مع تخصص الأمن السيبراني

1. إيش كان سبب دخولك لتخصص الأمن السيبراني؟

دخلت تخصص الأمن السيبراني بعد ما مريت بموقف صعب، حسّيت فيه بضعف الإنسان لما أحد يبتزه لمجرد إنه قدر يوصل لمعلوماته. شعور قاسي إنك تكون مكشوف، وإن أحد يملك عليك سلطة بس لأنه عرف شي ما كان المفروض يعرفه. بدأت الأسئلة تطاردني: "ليش أنا؟ كيف صار كذا؟ هل الموضوع سهل؟ هل أي أحد يقدر يسوي كذا؟" صرت أدور، أبحث، أقرأ… كنت أحتاج أفهم، أحتاج أسترجع قوتي، أحتاج أعرف كيف أحمي نفسي. ومن هنا بدأت رحلتي. دخلت التخصص بدافع شخصي جداً… بدافع حماية، فهم، واسترجاع الثقة. ومع الوقت، اكتشفت إن اللي صار ما كان مجرد موقف مؤلم، بل كان نقطة تحوّل. "أقسى التجارب أحيانًا تقودنا لأعظم الطرق"، وهذا بالضبط اللي صار. الموقف اللي كسرني، هو نفسه اللي وجهني لطريقي. واليوم، أقولها من قلبي: "الحمد لله إني اتخذت هذا القرار."

---